Mesaj pou tout fanm Vanyan Ayisyèn nan lokazyon jounen Mondyal Fanm.
Nan okazyon jounen mondyal fanm nan, nou koube nou byen ba pou n salye tout fanm vanyan ki nan mond lan. Tout fanm vanyan ayisyèn yo ki pa janm sispann lite.

Tout fanm vanyan ayisyèn ki rete konsekan, ki toujou ap travay di nan faktori, nan jaden, nan mache, k ap chache lavi lajounen kou lannwit pou fanmi yo, ki pa janm mezire efò ak sakrifis yo pou fè edikasyon nou. Nou koube nou byen ba devan tout Mari Jàn, devan tout Klè Erez ak tout kokenn gwo fanm ki gen diyite, ki gen nen nan figi yo, k ap travay chak jou pi plis pou fè peyi sa a pi bèl.

Yon gwo kout chapo pou sila yo ki kontinye ap goumen pou dwa fanm respekte, pou fanm ayisyèn yo ka jwenn plas yo merite nan sosyete a. Jounen sa a dwe fè nou sonje fanm yo se poto mitan sosyete a. Yo bay lavi, yo pote lavi. Gen nan yo ki konn menmm mouri lè y ap bay lavi. Yo se lavi.

Nou pa dwe bliye jodi a fanm yo, malgre tou sa, pami moun dwa plis vyole nan sosyete a, yo pami sila yo plis maltrete yo. Nan kèlkeswa sektè y ap evolye, se menmman parèyman. Jodi a se moman pou n di fòk sitiyasyon fanm Ayisyèn chanje. Fòk yo ka viv pi byen. Fòk dwa yo respekte, sa vle di, fòk yo ka gen chans ale nan bon jan lekòl, jwenn bon jan swen la sante lè yo malad.

Fòk yo ka travay selon konpetans yo, e fòk yo ka jwenn jistis lè yo fè vyolans sou yo. Fòk yo gen aksè ak bon jan kredi pou yo ka gen chans kreye plis richès. Fòk nou entegre yo. Fòk nou pwoteje yo. Fòk nou renmen yo chak jou pi plis . Fòk nou respekte yo. Fòk yo sispann fè vyolans sou yo yon fason pou yo ka jwi tout dwa yo genyen.

Nou konsyan gen anpil wout ki pou fèt. Batay la poko bout. Se pou sa nou repran angajman nou nan okazyon jounen mondyal fanm lan pou n di n ap kontinye batay, n ap kontinye kanpe bò kote tout sektè tout moun ak tout fanm ki dakò pou fanm ayisyèn afime lidèchip li, pran desten li nan men, pran responsabilite l ak patisipe nan tout desizyon ki konsène peyi a.
Fanm yo bay lavi. Yo pote lavi. Yo se lavi! Onè respè pou yo!

Onè respè! Onè respè!

DP BenecheMartial PouTgwav