Elektrisite Dayiti(EDH) Branch Tigwav gen plis pase 3 semèn l'ap bay yon kouran fèb k'ap monte desann,fas ak sitiyasyon sa abòne yo mande pou Dirijan yo nan EDH  founi esplikasyon sou pwoblèm sa ki deja fè manb popilasyon an pèdi anpil aparèy elektrik.

< Avan yè swa yo bay kouran menm yon anpoul li pa ka limen,li voup li monte,li boule yon televizyon,vantilatè ak yon radyo m genyen> deklarasyon yon abòne nan sant vil Tigwav ki mande Respomsab yo reglemante Sistèm nan k'ap mal mache nan komin nan.

Okenn dirijan Edh poko janm di yon mo ak abòne yo ki dekonekte tout aparèy yo pou evite yo kontinye sote pandan chak mwa bòdwo ap vin jwenn yo malgre jan y'ap resevwa vye kouran sa.

Kèk sitwayen jounal LE PETIT GOAVIEN kesyone sou dosye sa,yo konseye Dirijan yo an EDH branch Tigwav  la kanpe distribisyon kouran annatandan yo rezoud pwoblèm yo genyen an ki fè kouran ap monte desann nan.

                                                                                                                                                                                                                                   Dufort Fednor.   

Yon fenomèn ensekirite ap taye Banda nan 7èm Seksyon Komin Tigwav kote eskanmòtè pa sispann dechèpiye abitan yo lajounen kou lannwit konsa sitwayen kanton sa mande otorite konsène yo aji vit avan pita pi tris.

 Nan Lokalite Delat,vòlè yo deja kase plizyè kay epi pote ale,lajan peyizan yo,menm aksyon sa yo fèt nan mitan chemen,atoufè yo konn dechèpiye ti machann ki pral mache.Pi gwo ka,se Yon Dam ki t'ap sanble yon Kòb li te gen gen rive 35 Mil goud lè vòlè nan mitam lannwit te vin kase kay li epi pote ale montan sa,Daprè sa,yo abitan Delat rapòte jounal Le PETIT GOAVIEN.

Pou mete yon bout ak pratik sa,Abitan yo mande Depite Komin nan,Jacques S Thimoléon onore pwomès kanpay li,mete yon anèks Tribinal de pè ak yon sou komisarya nan Zòn.Sou menm blog sa nou te pibliye enfòmasyon sa,ki gen rapò dosye tribinal de pè pou 7èm Seksyon,relil.....http://le-petit-goavien.eklablog.com/byento-2-nouvo-tribinal-de-pe-komin-tigwav-a78480495 Se 24 Fevriye 2013.

 Byen Bonè Maten Dimanch 24 Fevriye a,Komisè Gouvènman Tigwav la,Mèt Jn Alix Civil,sibtiti komisè Gouvènman Mèt Eric Pierre Paul,Depite Jacques S.Thimoléon,vizite Lokalite Delat,7èm seksyon Komin Tigwav,Objektif Vizit sa,se pou jwenn yon kay pou loje yon anèks Tribinal de pè nan lokalite sa ki twouvel anviwon 30 kilomèt vil Tigwav,ki gen 19 abitasyon pou 25 mil abitan.                                                        

Daprè otorite yo,se yon pwojè Ministè Lajistis genyen pou mete Tribinal nan Seksyon yo,fok nou di peyizan yo deja dispoze yon Kay Pou loje Tribinal sa,avan lontan.Menm pwojè sa,ta dwe ateri 9èm seksyon komin Tigwav nan mitan Semèn sa,si n kwè deklarasyon Depite Komin Tigwav la,Jacques S Thimoléon,yon pwojè manb nan popilasyon aplodi.Nap soulinye,anpil zak malonèt toujou ap fèt nan seksyon yo akoz lajistis ak fòs lòd ki pa prezan.Enplantasyon Tribinal sa yo se Ka yon ouf pou popilasyon nan zon Benefisyè yo.

                                                                                  Delmondo Charlemagne.

Nan okazyon 11èm konsey Minis pou zafè Petrocaribe k'ap fèt nan lakou Peyi Dayiti 6 ak 7 Septanm,dirijan Konfederasyon  Jeneral Travayè yo (CGT) denonse gagòt ki genyen nan fon Petrocaribe a konsa yo mande Palmantè yo louvri yo pou wè jan fon sa ap depanse.

Nan yon Konferans pou laprès,Sekretè Jeneral CGT a,Mesye Roger Delassaint,bay nan lokal Lespwa fanm Ayisyèn,larat,vil Tigwav,jounen Vandredi 6 Septanm nan,Li kritike Administrasyon Mateli/Lamòt ki daprè li ap mal jere fon Petrocaribe a kote anpil kòb fè fon konsa li atire atansyon palmantè yo pou yo fè travay kontwòl,pèp la voye yo al fè a pou evite dèt monte pil sou pil sou do peyi a alòske pa gen anyen ki reyalize nan patenarya Venezyela/Ayiti a(PETROCARIBE)

Men Not la......

Salye tout jounalis  e nou pwofite okazyon sa a pou nou felisite yo you fwa ankò pou kouraj ak detèminasyon nan batay pou enplante demokrasi ak jistis sosyal nan peyi sa a.

Jounen 6 ak 7 sekptanm 2013 la ayiti ap resevwa 11e konsèy minis petrokaribe a. Nan reyinyon sa ap gen plizyè pwen kap debat tankou komès  kominikasyon touris kilti transpò etc.Nan delegasyon ki te akonpanye prezidan Preval  a Venezuela lèl tap siyen kontra petrokaribe a te gen sendikalis ki te nan deba yo sitou sou kesyon transpò. Paske yo se je ak zorey travayè ak Travayès yo. Men depi prezidan Matelly rive sou pouvwa a  se kòm si ni travayè ni reprezantan travayè yo pa egziste ankò nan peyi. Paske depi aprè diktati Duvalier yo, se sèl gouvènman Matelly/Lamothe la ki pa janm chita ak sendika. Men nou konnen zafè petrokaribe a se dèt kap fèt pou peye aprè. Se pa ni fanmi prezidan Matelly ni fanmi Premye Minis Lamothe kap dwe men se ckak grenn ayisyen kap dwe plizyè milya dola petrokaribe a.

Pou rezon sa yo CGT ap mete gouvènman Matelly Lamothe la an gad sou tout sa kap angaje peyi sa dwe fèt jan la lwa peyi mande sa. CGT ap mande Senatè ak depite yo ranmase eskanp figi yo nan mete bon jan  kontwòl sou gouvènman pou yo pa kite okenn akò zo pwason kole nan gojèt nou.

CGT ap di prezidan Matelly atansyon  sou kesyon transpò a se sendika ak Pwopriyetè machin ki regle zafè sa nan peyi a. Leta se taks sou gaz, asirans machin, viyèt e latriye yo okipe moun te mèt ap vwayaje tankou bèf ki pral labatwa pa entèrese leta sa a.  

CGT mande tout travayè, travayèz ak tout sendika nan peyi rete mobilize tann modód si se nou ki bay pouvwa fòk dwa nou respekte.

CGT ap pwofite nan pou oganizasyon eleksyon yo prese prese pou respekte echeans konstitisyonel la.

Viv lit klas travayè ak travayèz yo

Viv la CGT

Viv ayiti. Mèsi

Delassaint Roger

Sekretè Jeneral Confederation Général des Travailleurs (CGT).

Ajan UDMO nan tèt kole ak polisye lokal nan Vil Tigwav mennen yon operasyon gason pa kanpe nan lokalite Mawo,Tiginen ak labòn briz(GRAN RI VIL LA) aprè midi 4 Septann nan.

Je bande,gwo zam fann fwa nan men ak plizyè bonbòn gaz,fòs lòd yo kite komisarya a vè 2 zè konsa,yo dirije yo nan lokalite Koutis kote rebèl yo ap frape,la,ajan UDMO yo bat,kraze 3 moto taksi epi mete dife nan plizyè kay abitan yo,sa ki soulve kòlè sitwayen ki viktim yo,yo denonse britalite ajan PNH yo ki ta dwe pwoteje vi ak byen Sitwayen yo.

Menm operasyon sa te kontinye nan Baz Politik depite Jacques S. Thimoléon( GRAN RI) ki gen nan tèt li Felix Salomon Jeune kote fòs lòd yo woule anba baton tout jèn gason ki te chita nan baz la avan yo te arete yo pou mennen yo nan komisarya Tigwav la.50 minit aprè,Depi Tigwav la ak Majistra Sandra Jules britsoukou te debake pou te libere 17 jèn gason ki te arete yo.

Mesye Felix Salomon Jeune nan yon entèvyou li bay sou Radyo Preferans fm, aswè Mèkredi 4 Septanm denonse entèvansyon lapolis fè nan Baz Depite a sou Granri a,li demanti bri kouri kòm kwa li ta resevwa plizyè pataswèl nan men ajan UDMO yo,Mesye Jeune di menm touche polisye yo pa touche l.

Daprè yon sous nou ka fè konfyans,otorite jidisyè yo deja lanse 6 manda kont Nèg ak zam ki sou mòn yo,se moun nan katye koutis ki pote plent pou yo,daprè menm sous la,aksyon piblik ap mete an mouvman kont tout atoufè k'ap simen latwoublay nan komin nan.

Kèk notab nan vil la ap poze kesyon pou konnen,kiyès ki ka bay Ajan UDMO yo ki soti nan Pòtoprens lòd pou fè entèvansyon sa yo? Eskè yo te twonpe yo nan kout filè sa,oubyen eske polis la politize?  y'ap mande tou ki revandikasyon nèg ak zam ki sou mòn nan,kote yo jwenn gwo ZAM ki nan men yo? 3 kesyon manb nan popilasyon Tigwav ap tann repons yo.

                                                                               Delmondo Charlemagne.

Pandan tout moun Tigwav ki toupatou nan mond lan ap poze kesyon pou konnen kisa k'ap fèt pou 350 lane fondasyon vil la,rankont yo ap rapouswiv.

Prezidan Komite a,Jacques Philipe eugène nan yon entèvyou li bay RadyoSTV Dimanch 1 Septanm nan fè konnen avan ak pandan 18 Oktòb ,dat ki chwazi pou selebrasyon fèt la,ap gen anpil aktivite tankou Mis Souloukwaz ak Festival.

Nimewo en komite a konfime gen anpil manb ki abandone konsa y'ap fè demach pou entegre lòt pèsonalite,li site non Hugo ALLEN kòm moun ki deja nan komite a.