Yon gwoup Sivil ame ap fè lalwa yo renye depi Lendi 2 Septanm nan lokalite Mawo ak Djokann (11èm seksyon) komin tigwav jiska Madi 3 Septann nan katouch te kontinye ap chante nan 2 lokalite sa yo kote wout nasyonal nimewo 2 a bloke detanzantan.

Nèg ak zam sa yo ki tabli baz yo sou tèt mòn Djokann deja fès kare ak polis Tigwav,yo menm atake Ajan UDMO ki te vin bay ranfò ak polisye lokal yo kote yon ajan UDMO pran yon bal nan zepòl li aprèmidi Madi 3 Septanm nan.

Poze kesyon pou konnen objektif mouvman sa,Lidè mouvman an,ki pale sou plizyè medya nan vil Tigwav,fè konnen,se pou kiraj rivyè ak kouran alòske pwojè kouran an ap egzekite kote se fil k'ap pase sou poto yo,abitan Mawo ak koutis ki se prensipal viktim,lè fòs lòd ap entèveni denonse mouvman sa,yo estime ki gen yon Men kache ki dèyè l.

Sitiyasyon sa k'ap devlope a gen gwo konsekans sou tranpò an komen an,pasaje ki soti nan Nip,Sid,Grandans ak Lwès konn rete bloke pandan plizyè èd tan sou wout la.Kèk sitwayen nan komin nan pa kache enkyetid pou mouvman Sa pa kontinye fè san koule konsa yo mande otorite konsène yo pran responsablite yo avan pita pi tris.

                                                                                   Delmondo Charlemagne.

Gwoup refleksyon,etid ak aksyon Sosyal( GRETAS) tanmen Aswè Samdi 31 Out la( 7 h-9 h pm) ak yon seri konferans deba nan vil Tigwav sou plizyè Tematik.

Pou premye seyans lan,etidyan ki soti nan plizyè fakilte nan invèsite leta Dayiti a ak prive te reflechi sou tèm sa<Demokrasi ak eta de dwa an Ayiti> se Mèt Monferier Dorval ak Mèt Getho Lindor ki te entèvenan prensipal.

Nan lokal Radyo Kontak la,plizyè dizèn jèn te brase lide sou demokrasi ak eta de dwa ki daprè yo se 2 konsèp,ayisyen yo dwe konprann epi antre nan lojik tolerans,respè dwa moun kote tout moun ap santi yo alèz nan yon sosyete ki chita sou lalwa,lè sa dirijan nan 3 pouvwa yo ap konnen kote pouvwa yo kòmanse e kotel fini.

Dirijan GRETAS kase randevou ak jèn yo nan yon mwa ankò,nan menm lokal la ak yon lòt tematik,se yon veritab kafe literè.

                                                                                     Delmondo Charlemagne.

Abitan K'ap viv Fò Wayal,premyè seksyon Komin Tigwav Kontinye ap mande otorite yo rezoud pwoblèm tout kalte k'ap bwase bil yo Tankou wout ak Lekòl.

Fò Wayal ta dwe konsidere kòm Yon sit Istorik,pou sa l reprezante nan listwa Fondasyon Vil Komin Tigwav,se Deklarasyon Domingue Denis,Prezidan Gwoupman Fò Wayal ki Mande bon jan ankadreman pou abitan katye sa,ki pa gen wout,kouran,dlo ak lekòl.Pandan 350 LANE fondasyon Komin nan,Mesye Denis Swete otorite konsène Yo priyorize kanton sa ki pi meprize,gen plis pase 2 mil abitan kap viv Fò Wayal,daprè sa l di.

Yon lòt kote,Domingue DENIS denonse Mesye Hugo Allen,pwopriyetè OTèL Fò Wayal,li di,ki pran tou moniman ki te nan Fò a mete nan Otèl Fò la sou Pretèks,lè otèl rantre Lajan,y'ap ede zòn nan.Mesye Denis Mande otorite Lokal yo pou ede yo nan demach y'ap fè pou moniman yo ta tounen nan Plas yo.

                                                                                         Delmondo Charlemagne.

Defile,animasyon kiltirèl,konferans deba,se nan anbyans sa yo,Dirijan òGANIZASYON PEYIZAN FLòKèT fete 24 lane depi l fonde, jounen Vandredi 30 Out la nan lokal yo,Flokèt,12èm seksyon komin Tigwav.

Reprezantan nan Lajistis,Afè Sosyal,APV ak plizyè Santèn abitan zòn nan te reponn prezan nan seromoni an.Kòdonatè OPF la Yacinthe Octave nan diskou l felisite tèt li pou travay ki reyalize nan katye a,nan domèn Agrilkilti,kilti,anviwonnman ak edikasyon,Mesye Octave fè konnen ant depans ak sa ki rantre nan Kès asoyizayon an,li evalye ak 19 milyon goud.

Se te okazyon tou pou moun Flòkèt te vann sa yo pwodwi nan kanton an,vizitè yo te manje manje kreyòl epi danse twoubadou.

Gwo eskonbrit nan 4èm Seksyon Komin Tigwav aprè Lansman Pwojè konstriksyon Yon tronsyon wout,Jedi 13 Jwen 2013 la.

< Depite a mande m pou ankete sou dosye 500 mil goud ki nan men Kazèk Nosseil N Ferralus,lajan Ministè Enteryè mete sou kont Kazèk la pou Konstwi 3 Mache nan Seksyon an> se ak Fraz sa Majistra Prensipal komin Tigwav la Sandra Jules Komanse Diskoul nan lansman PwoJè konstriksyon plizè santèn mèt wout an bann Beton,yon pwojè kap koute 57 mil 845 dola Ameriken,ONG VNG ap finanse.

Kontakte sou dosye sa,Kazèk Nosseil N.Ferralus,kodonatè Katèl Kazèk 4èm seksyon Komin Tigwav,fè konnen,pèsonn pa envite l nan lansman Pwojè sa,ki daprè li,se yon kontinyite,nan yon premye tan,li di,se li ak ansyen Majistra Marc Roland Justal ki te Kòmanse demach yo,Kazèk la kritike enplikasyon Yon sitwayen ki pote Non Maxo Fatal ki pwoch Depite Thimoléon ak aktyèl Majistra Tigwav lan,nan tout desizyon ki gen pou wè ak dosye wout la aloske li pa konsène,Mesye Nosseil di l'ap kontrekare Otorite Lavil Tigwav yo,li di ki vle kontwole yo menm otorite lokal nan seksyon an.

Mesye Vyvens Marcelin,yon ansyen Kazèk,seksyon an,li menm tou pa dakò,pou mete sou kote,yon otorite lokal nan sa ki gen a wè ak pwojè k'ap egzekite Lakay li,pi lwen,ansyen kazèk la denonse tou prezans kèk endividi ki pa abite nan lokalite a ki nan komite pilotaj la,mesye Marcelin kwè se politik k'ap fèt nan pwojè sa pandan l mande Popilasyon an kale Jel pou travay yo byen reyalize.

                                                                        Delmondo Charlemagne.