Depi aprè evènman 2004 yo, nan vil Tigwav, prizon sivil la pa fonksyonèl,se komisarya yo ki tounen sant kaseral,yon sitiyasyon ki lakoz prizonye yo ap vin nan yon kondisyon deplorab kote tout kalte maladi ap frape yo.

Se anviwon 150 prizonye ki loje nan komisarya santral Tigwav la.Anpil nan yo,souvan tonbe malad,lè se pa kolera,se tibèkiloz ki frape yo aloske anpil nan yo poko janm pase devan jij natirèl yo.Se menm konsta pou 14 fanm ki nan sou komisarya ki twouvel Bon Sòlda nan lwès vil Tigwav,prizonye sa yo ki kroupi nan yon ti chanm kay,se la yo fè bezwen yo,se la yo manje tou,kèk nan yo esplike yo deja trape maladi enfeksyon vajinal akoz move dlo yap sèvi,prizonye sa yo k’ap viv nan yon kondisyon moun pa ta dwe ap viv mande otorite lapolis yo pou degaje kou mèt Jan Jak pou fè yo wè yon medsen.

Kontakte sou dosye sa, Komisè polis Tigwav la,Daniel Compère,li fè konnen,lap pote doleyans prizonye yo bay siperyè erachik li yo nan lide pou prizonye Tigwav yo ta genyen yon klinik a dispozisyon yo.Avan lontan,Komin Tigwav ap genyen yon prizon sivil kap gen yon kapasite 150 plas,se depatman deta ameriken ki finanse pwojè sa,daprè komisè Daniel Compère.

                                                                                      Delmondo Charlemangne.

Kalbas gran bouch yo toujou ap pale de devlopman nan lakou peyi dayiti,jou ale jou vini, pwoblèm tout kalte, kontinye ap brase bil peyizan nan seksyon kominal yo.

Monte anwo,desann anba,nap chèche,poun wè kote pwoblèm nan ye,nan seksyon kominal yo,lavi prèske fini,pwodiksyon lokal peyizan yo bese,agrikilti a,manke ankadreman,tèt mòn yo degrade,anpil pye bwa kontinye ap koupe pou fè chabon,konsa anpil kiltivatè kouri kite andeyò pou  tabli baz yo lavil,san yo pa al regle anyen.

Si se nan seksyon kominal yo prensipalman devlopman dwe fèt paske lavil se zòn rezidansyèl,anpil moun kòmanse enkyete pou avni peyi Dayiti,ki sou yon move pant kote,sou devlopman seksyon kominal  yo vizib.Anpil faktè lakoz : 1) Manke ankadreman nan sektè agrikilti a,kiltivatè yo pa jwenn teknisyen agrikòl pou montre yo koman pou yo travay latè.2) Nivo edikasyon an ba anpil,kote abitan yo kontinye ap aji nenpòt koman,yo mete yo nan denyè echèl,yo toujou kwè moun lavil se wa,yo panse,yo  menm ,yo enferyè konsa yo pa fè twòp efò pou chanje espas yap viv la.

Nan analiz ki fèt,kòmantè yo toujou chita sou movèz fwa,otorite yo kip a gen volonte pou chanje move kondisyon lavi,sila yo kap viv,nan seksyon kominal yo,ki souvan itilize nan moman eleksyon,anpil obsèvatè kwè se yon sou devlopman ki kondisyone.Chèf òganizasyon de baz yo,lage yo nan yon biznis,vann grenn vòt,la ankò,òganizasyon yo,fayi ak misyon yo ki se devlòpman.

Zòn andeyò yo se yo ki grenye lavil yo,si  yo pa pwodwi,sa vle di,moun lavil ap kontinye achte sa ki soti lòtbò dlo pou yo sèvi,malgre anpil vwa pa sispann leve pou mande,dirijan yo nan peyi Dayiti pou yo relanse pwodisyon nasyonal la pandan y’ap make prezans yo,nan seksyon kominal,nan fè wout,nan mete sèvis de baz yo.

Nouvèl ayiti a ap posib,lè Kazek yo,Azek yo,majistra yo,Depite,Senatè  ak Prezidan nan peyi Dayiti Genyen yon politik  sosyal.

                                                                                      Delmondo Charlemagne.

Nan radyo,nan televizyon ak sou rezo sosyo yo,banbochè ak banbochèz ki te yaya kò nan kanaval Dous Makòs nan vil Tigwav 9,10,11 ak 12 Fevriye 2013 pase a,kontinye ap mande òganizatè yo, yon rapò.

Nouvèl la te tonbe tankou yon bonm  16 Janvye 2013 la,lè Tigwavyen yo te tande,ane sa,se 4 jou plezi kanaval nan site Fosten Soulouk la,anpil kout fil,anpil monte desann,telefòn ap sonnen,se 350 kout chapo pou Tigwav,siw renmen Vil la,pote kole,bay piti pa chich,mobilizasyon  sa yo te kontinye,jiska  Samdi 9 Fevriye 2013 a 5 h 35,lè defile chanpwèl la te komanse,soti plas Abèy pou rive sou Gran Ri,vil Tigwav,nan yon fènwa kou lank,vizitè yo pat ka wè bèl nègès kreyòl Tigwav yo ki te byen banda pou bay,yon bèl espektak,malerezman ki soti anreta.S ak pa bon pou youn,li bon pou yon lòt,tout  pwoblèm sa yo ta pral fè banbochè yo voye 350 kout chapo pou Dj Papi mix ki te kontwole Beton an,ak animasyon,pandan 4 jou Kanaval la.

Lè se pa Direktè kèk estasyon Radyo kap mande pou peye  yo kòb espòt pwomosyon ki tap woule san rete sou antèn yo,se atis yo ki pa touche kap plenyen,kategori sa,toujou  ap bougonnen chak ane,pou yon 6èm fwa,farin nan toujou vini nan menm sak la.

Aprè anviwon,yon mwa,manb komite ki tap òganize 6èm edisyon kanaval  Kanaval Dous Makòs la,poko janm prezante rapò Finansye festivite yo,pou di a klè,konbyen lajan ki antre ak depanse.

                                                                                                                                                                                  Delmondo Charlemagne.

Jij de pè Winny Fred Noelsaint envite Ansyen Majistra komin Tigwav,Marc Roland Justal,pou l prezante nan biwo l Maten Mèkredi 27 Fevriye a,pou vin reponn kesyon l sou akizasyon ki pese sou do ansyen lokatè Meri Tigwav la,kòmkwa li tap itilize Materyèl meri a tankou SO,pandan l pa nan tèt Enstitisyon an.Jij de pè a,te deja fouye kay ansyen Majistra aswèJedi 21 Fevriye a,sou demand Aktyèl dirijan Meri a.Mesye Justal di,li prè pou reponn kesyon lajistis.